விண்கற்களிடமிருந்து பூமியை பாதுகாப்பது எப்படி.. 'ஐடியா' கேட்கும் ஐரோப்பிய விண்வெளி மையம்!

இப்படிப்பட்ட ஒரு விண்கல் தாக்குதலில் இருந்து தப்ப அமெரிக்காவின் நாஸாவும், ஐரோப்பிய நாடுகளின் கூட்டு விண்வெளி ஆராய்ச்சி மையமான European Space Agency-ம் இணைந்து பல்வேறு ஆய்வுகளை நடத்தி வருகின்றன.

இதில் முக்கியமான திட்டம் பூமியை நெருங்கும் விண்கல்லை அணுகுண்டுகள் கொண்ட ராக்கெட்கள் மூலம் தாக்கி சுக்குநூறாக்கி அழிப்பது.

மிக சக்தி வாய்ந்த லேசர்களைக் கொண்டு பூமியில் இருந்தோ அல்லது செயற்கைக் கோள்களில் இருந்தோ விண்கல்லை உடையச் செய்வது, பஸ்பமாக்கிவிடுவது இன்னொரு யோசனையாக உள்ளது.

இன்னொரு திட்டம் மாபெரும் ராக்கெட்டுகளின் உதவியோடு விண்கல்லில் மோதியோ அல்லது விண்கல்லின் பின்னால் இருந்து ராக்கெட்டுகளை உதவியோடு அதன் திசையை மாற்றச் செய்வது.

Asteroid Impact and Deflection mission (AIDA) என்று பெயரிடப்பட்டுள்ள இந்த ஆராய்ச்சிகளின் ஒருபடியாக விரைவில் Double Asteroid Redirection Test (DART) என்ற ஒரு விண்கலத்தை அனுப்பப் போகிறது ஐரோப்பிய விண்வெளி ஆய்வு மையம். இது விண்ணில் சுற்றி வரும் ஒரு 'ஜோடி' விண்கற்களை ஆய்வு செய்யப் போகிறது. ஜோடியாக சுற்றி வரும் இந்த விண்கற்களில் சிறிய கல்லில் இந்த விண்கலம் மோதும். அதே நேரத்தில் இன்னொரு விண்கலம் பெரிய விண்கல்லில் தரையிறங்கி ஆராயும். சிறிய விண்கல்லில் நடக்கும் மோதலையடுத்து அருகே உள்ள விண்கல்லில் என்ன நடக்கிறது என்பதை ஆராயப் போகிறார்கள்.

இவ்வாறு சில திட்டங்கள் கைவசம் இருந்தாலும் இது தொடர்பாக பொது மக்களிடம் இருந்து ஆய்வுக்குரிய கருத்துக்களைக் கேட்கிறது ஐரோப்பிய விண்வெளி ஆய்வு மையம். இந்தத் திட்டத்துக்கு நல்ல யோசனைகளை யார் வேண்டுமானாலும் தரலாமாம். ஏற்கனவே ஏராளமான யோசனைகள் வந்து குவிய ஆரம்பித்துவிட்டனவாம். இதில் நல்ல யோசனைகளை வரும் பிப்ரவரி 1ம் தேதி வெளியிடப் போகிறது ஐரோப்பிய விண்வெளி ஆய்வு மையம்.

ரஜினிகிட்ட ஒரு இரும்பு கம்பியை குடுத்து, ராக்கெட்ல ஏத்திட்டுப் போயி விண்கல்லை அடிச்சு தூள் தூளாக்கலாம்.. 'பவர் ஸ்டாரின்' பெரிய போட்டோவை விண்கல் பக்கமா காட்டுனா.. அது தானே வேற பக்கமா போயிரும் போன்ற யோசனைகள் ஏற்கப்படா!