டிஜிட்டல் கியூப்பில் மீண்டும் வெளியாகிறது சிவாஜியின் வசந்த மாளிகை!!

தமிழில் அன்றைக்கு ஓட்டத்தில் மட்டுமல்ல, வசூலிலும் சாதனைப் படைத்த படம் இது. அருமையான படமாக்கம், காதுக்கினிய பாடல்கள் - இசை, பிரமிக்க வைக்கும் நடிப்பு என அனைத்து வகையிலும் ஒஸ்தியான காதல் படமாகத் திகழ்ந்தது வசந்த மாளிகை.

அன்றைக்கு இந்த படம் 13 இடங்களில் 100 நாட்களை தாண்டி ஓடியது. மதுரை நியூ சினிமா தியேட்டரில் 200 நாட்களும், சென்னை சாந்தி தியேட்டரில் 176 நாட்களும் ஓடியது குறிப்பிடத்தக்கது.

இந்த படம் இப்போது டிஜிட்டல் கியூப்பில் புதுப்பிக்கப்பட்டு மீண்டும் ரிலீசாகிறது. டிஜிட்டலில் கர்ணன் படம் வெளிவந்து வெற்றி பெற்றதைத் தொடர்ந்து வசந்த மாளிகை படத்தையும் டிஜிட்டல் கியூப்பில் மாற்றியுள்ளனர். இதற்கான வேலைகள் அனைத்தும் முடிந்து தமிழகம் முழுவதும் 80 தியேட்டர்களில் மார்ச் 1-ம் தேதி திரையிடப்படுகிறது.

வசந்த மாளிகை பிரிண்ட்கள் ‘கியூப்' தொழில் நுட்பத்தில் மாற்றப்பட்டுள்ளன. இதன்மூலம் அனைத்து திரையரங்குகளிலும் ஒரே நேரத்தில் காட்சிகள் திரையிடப்படும் வசதி இதன்மூலம் கிடைக்கிறது.

அத்துடன் ஒலி அமைப்புகள் துல்லியமாக கேட்கும் வகையில் டிஜிட்டல் தொழில் நுட்பமும் புகுத்தப்பட்டுள்ளது. எனவே கர்ணன் டிஜிட்டல் படத்தில் இருந்த கரகர சத்தங்கள் இதில் இருக்காது. ஒலி துல்லியமாகவும், புதுமையாகவும் இருக்கும். ரூ.10 லட்சம் செலவில் பணிகள் நடந்து முடிந்துள்ளன.