ரூ 60 லட்சம் செட் பழசாகக் காத்திருக்கும் 'கும்கி' டீம்!

கும்கி படம் குறித்து வரும் செய்திகள், அந்தப் படத்துக்கான எதிர்ப்பார்ப்புகளை வெகுவாக அதிகரித்துள்ளது.

பிரபுவின் மகன் விக்ரம் பிரபு நடிக்கும் இந்தப் படத்தில் மலையாள நடிகை லட்சுமி மேனன் நாயகியாக நடிக்கிறார்.

பிரபு சாலமன் இயக்கத்தில் படப்பிடிப்பு வேகமாக நடந்து வருகிறது. யானைகளின் வாழ்க்கையைப் பின்னணியாகக் கொண்டு எடுக்கப்படும் பிரமாண்ட காதல் படம் இது. பெரும்பகுதி படப்பிடிப்பு கேரளாவின் அடர்ந்த காடுகளில்தான்.

கும்கி கிளைமாக்ஸுக்காக சமீபத்தில் ரூ 60 லட்சத்தில் ஒரு செட் போட்டிருக்கிறார்கள் கேரளாவின் மூணாறு பகுதியில்.

ஆனால் போட்டவுடன் படப்பிடிப்பு நடத்தவில்லை. காரணம், செட் புதிதாக இருந்ததுதானாம். எனவே அது பழசாக இப்போது காத்திருக்கிறார்கள் இயக்குநர் உள்ளிட்ட குழுவினர்.

இதுகுறித்து இயக்குநர் பிரபு சாலமனிடம் கேட்டபோது, "செட் புதிதாக இருந்தால் அன்னியமாக இருக்கும். சரி பழசாகவே போட்டுவிடலாம் என்றால், அதில் பர்பெக்ஷன் கிடைக்காது, முழுமையாகவும் இருக்காது. எனவே அந்த செட் இயற்கையாகவே பழசாக வேண்டும். அதனால் காத்திருக்கிறோம்," என்றார்.