காதலர் வாரமாக மாறிய காதலர் தினம்… கோடிகளில் வர்த்தகம்

காதலுக்காக அதிகம் யார் செலவு செய்கின்றனரோ அவர்கள் அதிகமாக காதல் வைத்துள்ளனர் என்ற பிம்பம் உருவாக்கப்பட்டு விட்டது. எனவே அமெரிக்காவில் ஒருவர் சராசரியாக 126 டாலர்கள் காதலர் தினத்திற்கு செலவு செய்கின்றனராம்.

காதலியுடன் ஹெலிகாப்டரில் சுற்றுங்கள் என்பது தொடங்கி பிரம்மாண்டமான பார்ட்டி வரை திட்டங்களை அறிவித்து காதலர்கள் மூலம் கோடி கோடியாய் வருமானம் பார்க்கின்றனர்.

அமெரிக்காவில் 30 ஆயிரம் நகைக்கடைகளில் 3 பில்லியன் நகைகள் விற்பனை செய்யப்பட்டுள்ளன. 11 பில்லியன் அளவுக்கு சாக்லேட்கள் விற்பனையாகியுள்ளன. இப்போது காதலர் தினத்திற்கு காஸ்ட்லியான ஐபோன், டேப்ளட் போன்றவை பரிசுப்பட்டியலில் இடம் பிடித்துள்ளது.

இங்கிலாந்தில் கடந்த ஆண்டு காதலர் தினத்திற்கு 21 மில்லியன் சிவப்பு ரோஜாக்கள் விற்பனையாகியுள்ளன. உலகம் முழுவமும் ஹால்மார்க் என்ற ரோஜா நிறுவனம்180 மில்லியன் சிவப்பு ரோஜாக்களை விற்பனை செய்துள்ளது.

கடந்த ஆண்டு காதலர் தினத்திற்காக அமெரிக்காவில் 17.6 பில்லியன் டாலர் செலவிடப்பட்டுள்ளது. இது முந்தைய ஆண்டை விட 8.6 சதவிகிதம் அதிகம் என்று அமெரிக்காவின் தேசிய விற்பனை சில்லறை சம்மேளனம் தெரிவித்துள்ளது.

வர்த்தகத்தையும் தாண்டி சீனாவில் காதலர் தினத்தை ஒட்டி நவீன சுயம்வரம் நடக்கிறது. அங்குள்ள ஷாங்காய் நகரின் மக்கள் சதுக்கத்தில் பிப்ரவரி 13ம் பெற்றோர்களும், இளம் வயது பிள்ளைகளும் கூடுகின்றனர். தங்களின் பெயர், வயது, உடல்தகுதி, வேலை, சம்பளம் ஆகியவற்றை எழுதி ஒரு மரத்தில் சீட்டு கட்டி விடுகின்றனர். அதை படித்து பிடித்தவர்கள் ஒன்றாக இணைகின்றனர்.

இதேபோல் சீனாவில் நேக்டு வெட்டிங் என்ற கலாச்சாரம் பரவலாகி வருகிறது. அதாவது வீடு, கார் உள்ளிட்ட எந்தவித அடிப்படை வசதிகளுமே இல்லாத காதலர்கள் பிப்ரவரி 14ம் தேதி காதலர் தினத்தில் வீதியில் திருமணம் செய்து கொள்கின்றனர்.

தாய்லாந்தின் பிராச்சின்புரி மாகாணத்தில் உள்ள மலையில் ஒவ்வொரு காதலர் தினத்துக்கும் குவியும் காதலர்கள் மலையில் இருந்து கயிறின் மூலம் குதித்து அந்தரத்தில் திருமணம் செய்து கொள்கின்றனராம்.

காதலர் தினம் வர்த்தகமாக மாறியதை அடுத்துதான் இந்தியாவில் பல்வேறு அமைப்புகள் காதலர் தினம் கொண்டாட எதிர்ப்பு தெரிவித்து வருகின்றன. காதலை பகிரங்கமாக வெளிப்படுத்தி பல ஆயிரம் ரூபாய் மதிப்புள்ள பரிசளித்தால் மட்டுமே காதலை உணர்த்த முடியும் என்பதில்லை. உண்மையான அன்பு இருப்பவர்களுக்கு தினம் தினம் காதலர் தினம்தான் என்கின்றனர் உண்மையான காதலர்கள்.