ஸ்டாலின் மகனுக்கு 'தலைவலி' தந்த ஹம்மர்.. ஆனால் நாயுடு 'தலை'யைக் காத்த அட்டகாச கார்!

உதயநிதி ஸ்டாலின் வாங்கிய கார் ஹம்மர் எச்3 வகையாகும். இதன் விலை அப்போது ரூ. 20 கோடி என்று கூறப்படுகிறது.

பக்காவான பாதுகாப்பு அம்சங்களுடன் கூடிய கார் ஹம்மர். சாலையில் இறங்கி ஓட ஆரம்பித்தாலே அத்தனை பேரும் ஆச்சரியத்துடன் பார்த்து பிரமிக்கக் கூடிய கம்பீரமான வடிவமைப்பு இதற்கு உண்டு.

இந்தக் காரின் விற்பனை எல்லா நாடுகளிலும் இருக்காது. குறிப்பிட்ட சில நாடுகளில்தான் இதை வாங்க முடியும். தத்தமது நாடுகளில் உள்ள கார் விற்பனை நிறுவனங்களை அணுகி அவர்கள் மூலம் ஆர்டர் செய்து இந்தக்காரை வாங்கலாம்.

உதயநிதி ஸ்டாலின் இந்தக் காரை ஆஸ்திரேலியாவிலிருந்து இறக்குமதி செய்ததாக கூறப்படுகிறது. அப்படி வாங்கியபோது அதற்குரிய வரியை இந்திய அரசுக்கு செலுத்தவில்லை என்பதுதான் சர்ச்சையாகும்.

இந்த ஹம்மர் கார், ஸ்டாலின் குடும்பத்துக்கு தலைவலியை ஏற்படுத்தியிருந்தாலும், முன்னாள் ஆந்திர முதல்வர் சந்திரபாபு நாயுடுவின் தலையைக் காத்த காராகும் - அதாவது உயிரைக் காத்த கார்.

2003ம் ஆண்டு அக்டோபர் 1ம் தேதி திருப்பதி அருகே நக்சலைட்கள் வைத்த வெடிகுண்டில் சந்திரபாபு நாயுடுவின் ஹம்மர் கார் சிக்கிக் கொண்டது. அந்த சம்பவத்தில் நாயுடு சிறிய காயத்துடன் உயிர் தப்பினார். பாதுகாப்பு அம்சங்களுடன் கூடிய கார் என்பதால் நாயுடு உள்பட காரில் இருந்த அனைவருமே காயங்களுடன் தப்பினர்.

உதயநிதி ஸ்டாலின் ஹம்மர் கார் வைத்திருக்கிறார் என்றால், தந்தை மு.க.ஸ்டாலின் ரேஞ்ச் ரோவர் கார் வைத்திருக்கிறார். இன் விலை ரூ. 90 லட்சத்திற்கும் மேல் என்று கூறப்படுகிறது.