டெல்லி சட்டசபை தேர்தலில் பாஜக தான் வெற்றி பெறும்: ஜோதிடர் கணிப்பு
டெல்லி சட்டசபை தேர்தல் நாளை நடக்கவிருக்கிறது. நாளை பதிவாகும் வாக்குகள் வரும் 8ம் தேதி எண்ணப்பட்டு முடிவுகள் அறிவிக்கப்படும். இந்த தேர்தலில் ஆளும் காங்கிரஸ், முக்கிய எதிர்கட்சியான பாஜக மற்றும் புதிதாக வந்திருக்கும் அரவிந்த் கெஜ்ரிவாலின் ஆம் ஆத்மி கட்சி ஆகியவைக்கு இடையே மும்முனை போட்டி நிலவுகிறது.
இந்நிலையில் ஜோதிடர் அனுஜ் கே. சுக்லா தேர்தல் முடிவு குறித்து கணித்து தெரிவித்துள்ளார்.
16.8.1968ல் பிறந்த ஆம் ஆத்மி கட்சி தலைவர் அரவிந்த் கெஜ்ரிவால் ரிஷப ராசிக்காரர். அவர் டெல்லி சட்டசபை தேர்தலில் தனி நபராக வெற்றி பெறாவிட்டாலும் அவரது கட்சி குறைந்தது 4 இடங்களையாவது கைப்பற்றுமாம். 31.3.1938 அன்று பிறந்த டெல்லி முதல்வர் ஷீலா தீட்சித் கடக ராசிக்காரர் ஆவார். அவர் மீண்டும் முதல்வராகாவிட்டாலும் காங்கிரஸ் 20 இடங்களில் வெற்றி பெறுமாம்.
பாஜக சார்பில் முதல் வேட்பாளராக நிறுத்தப்பட்டுள்ள முன்னாள் சுகாதாரத் துறை அமைச்சர் டாக்டர் ஹர்ஸ்வர்தன் 13.12.1954 அன்று பிறந்தவர். எண் ஜோதிடப்படி அவரது பெயர் 4ல் முடிகிறது. டெல்லி தேர்தலும் 4ம் தேதி நடைபெறுகிறது. அவரது ராசிப்படி பாஜக 40 இடங்களில் அமோக வெற்றி பெறுமாம்.