இந்தியாவின் "செவ்வாய் கிரகப் பிரவேசத்திற்கு" இன்னும் 2 நாட்களே.... பரவசத்தில் இந்தியர்கள்!

சீனாவை முந்திக் கொண்டு இந்தியா முதல் ஆளாக தனது செவ்வாய் கிரக பயணத்தை வெற்றிகரமாக்கப் போகிறது என்பதுதான் இதன் முக்கிய அம்சமாகும்.

இந்தியாவின் மங்கள்யான், செவ்வாய் கிரக சுற்றுப் பாதையை வெற்றிகரமாக அடைந்து விட்டால் அது மிகப் பெரிய ஆசி சாதனையாகவும் மாறும்.

அதாவது செவ்வாய் கிரக சுற்றுப் பாதையில் தனது விண்கலத்தை வெற்றிகரமாக செலுத்திய முதல் ஆசிய நாடாக இந்தியா உருவெடுக்கும்.

இதற்கு முன்பு 2011ம் ஆண்டு சீனா தனது யிங்குயோ 1 என்ற விண்கலத்தை செவ்வாய்க்கு அனுப்பியது. ஆனால் அது தோல்வியில் முடிந்தது. அதேபோல ரஷ்யாவும் 1998ம் ஆண்டே போபோஸ் கிரன்ட் என்ற விண்கலத்தை அனுப்பியது. அதுவும் தோல்வியில் முடிந்தது. அதபோல ஜப்பான் அனுப்பிய விண்கலம் எரிபொருள் தீர்ந்து போனதால் தோல்வியில் முடிந்தது.

இந்தியா தனது மங்கள்யான் விண்கலத்தை வெறும் 15 மாதங்களில், மிகக் குறைந்த பொருட் செலவல் உருவாக்கியது என்பதுதான் விசேஷமே. வேறு எந்த நாடும் தனது செவ்வாய் திட்டத்துக்காக இவ்வளவு குறைந்த செலவை செய்ததில்லை. எனவே அந்த வகையிலும் மங்கள்யான் ஏற்கனவே சாதனை படைத்து விட்டது.

மேலும் முதல் முயற்சியிலேயே செவ்வாய் கிரகத்தின் சுற்றுப் பாதைக்குள் தனது விண்கலத்தை வெற்றிகரமாக செலுத்திய முதல் நாடாகவும் இந்தியா உருவெடுக்கும் என்பது இன்னொரு பெருமிதமாகும்.