கண்ணாமூச்சி ஆடும் பருவமழை.. விவசாயம் பாதிப்பு: உணவு பொருட்கள் விலை உயரும் அபாயம்

பஞ்சாப் மற்றும் ஹரியானாவில் மழை நீர் பற்றாக்குறை 60 சதவீதமாக உள்ளது. சில மாநிலங்களில் கடந்த சில நாட்களாக சுத்தமாக மழை பெய்யவில்லை.

அடுத்த 7 நாட்களுக்கு இந்தியாவின் வடக்கு மற்றும் வடமேற்கு மாநிலங்களில் லேசான மழை பெய்யும் என்று வானிலை ஆய்வு மையம் தெரிவித்துள்ளது. இதனால் நெல், பருத்தி, தானிய பயிர்களின் விளைச்சல் பாதிக்கப்படும்.

உத்தரகண்ட், இமாச்சல பிரதேசம், ஜம்மு காஷ்மீர் ஆகிய மாநிலங்களில் வழக்கத்தை விட மிக மிகக் குறைவாக மழை பெய்துள்ளது.

பஞ்சாப் மாநிலத்தில் உள்ள விவசாய நிலங்களில் 95 சதவீதம் நிலங்களில் நீர்ப்பாசன வசதிகள் உள்ளன. ஆனால் பம்புசெட் உள்ளிட்டவற்றை இயக்க மின்சாரம், டீசல் தேவைப்படுவதால் தானியங்களை விளைவிக்க அதிக செலவாகலாம்.

பருவமழை பொய்த்துவிட்டதால் உணவுப் பொருட்களின் விலை உயரும் அபாயம் ஏற்பட்டுள்ளது. ஏற்கனவே அத்தியாவசியப் பொருட்களின் விலை விண்ணைத் தொடும் அளவுக்கு உள்ளது என்பது குறிப்பிடத்தக்கது.