மகாராஷ்டிராவில் பாஜக அணி 24-30 இடங்களை கைப்பற்றும்- கருத்து கணிப்பு

மகாராஷ்டிரா மாநிலத்தில் மொத்தம் உள்ள 48 தொகுதிகளில் 24-30 இடங்களை பாரதிய ஜனதா, சிவசேனா மற்றும் இந்திய குடியரசுக் கட்சி கூட்டணி கைப்பற்றும் என்று தெரிவிக்கப்பட்டுள்ளது. அதாவது மொத்தம் 43% சதவீத வாக்குகள் கிடைக்குமாம்.

காங்கிரஸ் தலைமையிலான ஐக்கிய முற்போக்குக் கூட்டணிக்கு 16 முதல் 22 இடங்கள் கிடைக்குமாம். இந்த அணிக்கு 33% வாக்குகள் கிடைக்குமாம்.

மகாராஷ்டிராவில் ஆம் ஆத்மி கட்சிக்கு 5% வாக்குகள் மட்டுமே கிடைக்குமாம். ஒரு தொகுதி கூட கிடைக்காதாம்.

இதேபோல் மகாராஷ்டிரா நவநிர்மான் சேனா அமைப்பும் 3% வாக்குகளைப் பெற்றாலும் ஒரு இடத்திலும் கூட வெல்லாதாம்.

விதர்பா பகுதியில் பாஜக அணிக்கும் ஆம் ஆத்மிக்கும் இடையே கடும் போட்டி இருக்குமாம்.. மராத்வாடா பகுதியில் பாஜக-சிவசேனா அணிக்கும் காங்கிரஸ்- தேசியவாத காங்கிரஸ் அணிக்கும் இடையே கடும் போட்டியாம். வடமகாராஷ்டிரா, மும்பை-தானே பகுதியில் பாஜக அணி முன்னணியில் இருக்கிறதாம். மேற்கு மகாராஷ்டிராதான் காங்கிரஸ் அணிக்கு கை கொடுக்கிறதாம்..

மகாராஷ்டிராவின் நகர்ப்புற வாக்காளர்களில் 48% பேர் பாஜக அணியையும் 29% மட்டுமே காங்கிரஸ் அணியையும் ஆதரிக்கிறார்கள். கிராமப்புறங்களில் இரு அணிகளையும் கிட்டதட்ட சம அளவில் பாஜக அணியை 39% பேரும் காங்கிரஸ் அணியை 36% பேரும் ஆதரிக்கின்றனராம்

இந்த மாநிலத்தில் மராத்தா சமூகத்தினர், உயர்ஜாதியினர், இதர பிற்படுத்தப்பட்டோர் கணிசமான அளவில் பாஜகவை ஆதரிக்கின்றனர். தாழ்த்தப்பட்ட பழங்குடி இனத்தவரிடையே காங்கிரஸ்- பாஜக அணிகளுக்கு சம அளவிலான ஆதரவு இருக்கிறது.

இங்கு இஸ்லாமியர்களில் 84% பேர் ஆதரவு காங்கிரஸ் அணிக்குத்தான் கிடைத்திருக்கிறதாம்.

மகாராஷ்டிராவில் பால் தாக்கரேவின் அரசியல் வாரிசாக சிவசேனா தொண்டர்கள் உள்ளிட்டோர் ராஜ்தாக்கரேவைத்தான் கருதுகின்றனராம். உத்தவ் தாக்கரேவைவிட மிக அதிகமாக 41% ஆதரவு ராஜ் தாக்கரேவுக்குத்தான் இருக்கிறதாம்.

நரேந்திர மோடியை பிரதமராக்க மகாராஷ்டிரா நவநிர்மான் சேனா ஆதரவு தெரிவித்திருப்பதன் மூலம் பாஜக-சிவசேனா அணிக்கு கூடுதல் பலம் என 40% பேர் கூறியுள்ளனர்.

இம்மாநிலத்தில் மோடி பிரதமராக வேண்டும் என்று 42% பேரும் ராகுல் பிரதமராக 16% பேரும் ஆதரவு தெரிவித்துள்ளனர்.