மோடியுடன் செல்வதைத் தவிர்த்த ரிலையன்ஸ் முகேஷ் அம்பானி

பிரதமரான பின்னர் முதல் முறையாக ஜப்பானுக்குச் சென்றுள்ளார் மோடி. அவருடன் பல தொழிலதிபர்கள் அடங்கிய வர்த்தகக் குழுவும் ஜப்பான் வந்துள்ளது.

மோடி தரப்புக்கு மிகவும் நெருக்கமானவராக கருதப்படும் அடானி குழுமத் தலைவர் கெளதம் அடானி, பார்தி நிறுவனத் தலைவர் சுனில் பார்தி மிட்டல், எஸ்ஸார் குழுமத் தலைவர் சசி ரூயா, விப்ரோ தலைவர் ஆஸிம் பிரேம்ஜி, ஐசிஐசிஐ தலைமை செயலதிகாரி சந்தா கோச்சார் உள்ளிட்டோர் மோடியுடன் ஜப்பான் வந்துள்ளனர்.

மாருதி சுஷுகி நிறுவன தலைவர் ஆர்.சி. பார்கவா, கிரண் மஜூம்தார், உள்ளிட்டோரும் மோடியுடன் வந்துள்ளனர்.

இதில் முகேஷ் மட்டும்தான் மிகப் பெரிய மிஸ்ஸிங் ஆவார். இதற்கான காரணத்தை அரசுத் தரப்பும், ரிலையன்ஸ் தரப்பும் அதிகாரப்பூர்வமாக தெரிவிக்கவில்லை. அதேசமயம், முன்கூட்டிய சில நிகழ்ச்சிகள் முடிவு செய்யப்பட்டு விட்டதால் முகேஷால் வர முடியவில்லை என்று அதிகாரப்பூர்வமற்ற தகவல்கள் தெரிவிக்கின்றன.

ஆனால் அடானியுடன் சேர்ந்து போவதையும், பாஜக முத்திரை தன் மீது விழுவதையும் தவிர்க்கவே முகேஷ் போகவில்லை என்று தெரிகிறது.

கடந்த லோக்சபா தேர்தலின்போது பாஜகவுக்கு அடானிதான் செலவுகளைப் பார்த்துக் கொண்டதாகவும், பெருமளவில் பொருளதவி அளித்ததாகவும் சர்ச்சைகள் வெடித்தன. இதை வைத்து காங்கிரஸுக்கு அம்பானி, பாஜகவுக்கு அடானி என்று சமூக வலைத்தளங்களிலும் கூட கருத்துக்கள் உலா வந்தன என்பது நினைவிருக்கலாம்.