அனுமதியே பெறாமல் அரசு பங்களாக்களில் தாறுமாறாக கை வைக்கும் மக்கள் தலைவர்கள்!

டெல்லியில் உள்ள அரசு பங்களாக்களில் நம் இஷ்டப்படி எந்த மாற்றத்தையும், கட்டுமானத்தையும் செய்ய யாருக்கும் உரிமை இல்லை. அனுமதியும் இல்லை.

ஆனால் இந்த விதியை காற்றில் தாறுமாறாக பறக்க விட்டுள்ளனர் 230 எம்.பிக்கள். கடந்த 10 ஆண்டுகளில் 230 எம்.பிக்கள் தங்கள் இஷ்டப்படி பங்களாக்களை மாற்றியமைத்துள்ளனர்.

இந்த 230 பேரில் கத்காரி, கல்ராஜ் மிஸ்ரா, யஸ்வந்த் சின்ஹா, ராம் விலாஸ் பாஸ்வான், காங்கிரஸ் தலைவர்கள் அகமது படேல், சுரேஷ் கல்மாடி ஆகியோரும் அடக்கம்.

ஆனால் 150 வீடுகளில் மேற்கொள்ளப்பட்ட அனுமதி பெறாத மாற்றங்களை இன்னும் கூட அகற்றாமல் கம்மென்று இருக்கிறது இவற்றையெல்லாம் கண்காணிக்க வேண்டிய மத்திய பொதுப்பணித்துறை.

இந்த சட்டவிரோத கட்டுமானங்களின் அளவானது 400 சதுர அடி முதல் 5000 சதுரி அடி வரை மேற்கொள்ளப்பட்டுள்ளது குறிப்பிடத்தக்கது.

அமைச்சர்களுக்கான பங்களாக்கள் வழக்கமாக 8250 சதுர அடி பரப்பளவில் இருக்கும். இதில் 8 படுக்கை அறைகள், நான்கு பெரிய ரூம்கள், 2 காரேஜ்கள் இருக்கும். மேலும், முன்னாலும், பின்னாலும் பெரிய புல்வெளிகளும் பரந்து விரிந்திருக்கும்.

நிதின் கத்காரி தீன்மூர்த்தி லேனில் 13ம் எண் வீட்டில் முன்பு இருந்தார். அப்போது அங்கு அனுமதி பெறாமல் முன்பக்கம் ஒரு பெரிய அறை, பின்பக்கம் ஒரு அறை, வேலைக்காரர்கள் குடியிருப்புப் பகுதியில் ஒரு அறையைக் கட்டியுள்ளார். அதாவது 1000 சதுர அடிக்கு இதைக் கட்டியுள்ளார்.

அதேபோல முன்னாள் அமைச்சரும், பாஜக தலைவர்களில் ஒருவருமான நடிகர் சத்ருகன் சின்ஹா தான் வசித்த பங்களாவில் 1173 சதுர அடி பரப்பளவில் ஒரு அறை மற்றும் அலுவலகத்தைக் கட்டியுள்ளார்.

ஊழல்வாதியாக முத்திரை குத்தப்பட்டு விட்ட முன்னாள் மத்திய அமைச்சர் சுரேஷ் கல்மாடி தான் வசித்த பங்களாவில் ஒரு அறை, அலுவலகம் மற்றும் ஷெட் போட்டிருந்தார். மொத்தம் 3300 சதுர அடியில் இதைச் செய்திருந்தார்.

பாஜகவின் கல்ராஜ் மிஸ்ரா 2006ம் ஆண்டு தான் தங்கியிருந்த அரசு பங்களாவில் சட்ட விரோதமாக ஒரு பேட்மிண்டன் கோர்ட்டை ஏற்படுத்தியிருந்தார். அங்கு டாய்லெட்களையும் கூடுதலாக கட்டியுள்ளார்.

பத்துக்குப் பத்து அறை கட்டவே அல்லாடும் மக்கள் நமது நாட்டில் கோடிக்கணக்கில் உள்ளனர். ஆனால் அந்த மக்களால் தேர்ந்தெடுக்கப்பட்ட மக்கள் பிரதிநிதிகளோ அரசின் அனுமதியைக் கூடப் பெறாமல் அலட்சியமாக செயல்படுவது அதிர்ச்சியாகத்தான் உள்ளது.