ஆடு, என்கவுண்டர் முதல்வர், நாயின் உறவினர், டீக்கார்.... மாறி மாறி மோடி தலையை உருட்டும் தலைவர்கள்
டெல்லி: பாஜக பிரதமர் வேட்பாளரான நரேந்திர மோடியை மற்ற கட்சியினர் வெவ்வேறு விதமாக விமர்சித்து வருகின்றனர்.
அரசியல் மேடைகளில் தங்களது கட்சியின் சிறப்புகளைக் கூறுவதை விட எதிர்க்கட்சியினரின் குறைகளைச் சுட்டிக் காட்டிப் பேசுவதே பெரும்பாலும் வழக்கத்தில் உள்ளது.
அதிலும் பாஜக பிரதமர் வேட்பாளரான மோடியை, ஒரு புறம் தொண்டர்கள், ‘நமோ... நமோ..' என புகழ் பாடிக் கொண்டிருக்க மறுபுறம் பலர் 'சுமோ' விளையாட்டு போல கடுமையான வார்த்தைகளால் வசை பாடி வருகின்றனர்.
சுயநலமிக்க ஆடு...
நேற்று பாஜக பிரதமர் வேட்பாளர் மோடியை சுயநலமிக்க ஆடு போன்றவர் என விமர்சித்துள்ளார் ராஷ்டிரிய லோக்தள சக்தி கட்சித் தலைவர் அஜித் சிங்.
டீ விற்பவர்...
காங்கிரஸ் தலைவர்கள் பலர் மோடியை டீ விற்பவர், டீக்கடைக்காரர் என பலகாலமாக விமர்சித்து வருகின்றனர்.
இந்தியாவை அழிக்க வந்த சக்தி...
இதே போன்று காங்கிரஸ் செய்தி தொடர்பாளர் அபிஷேக்மனு சிங்வி கூறுகையில் இந்தியாவை அழிக்க வந்தவர் என்று கூறினார்.
என்கவுண்டர் முதல்வர்...
கடந்த வியாழனன்று மோடி குறித்து குறிப்பிடுகையில் மத்திய நிதியமைச்சர் ப.சிதம்பரம் 'என்கவுண்டர் முதல்வர்' எனக் குறிப்பிட்டார்.
நாயின் உறவினர்...
அதற்கு சில தினங்களுக்கு முன்னர் மோடியை சமாஜ்வாடி கட்சித் தலைவர் ஆசாம் கான் ‘நாயின் உறவினர்' எனக் கூறியது குறிப்பிடத்தக்கது.
ஆண்மையற்றவர்...
அதேபோல், காங்கிரஸ் தலைவர் திக்விஜய் சிங், மோடியை ‘ஆண்மையற்றவர், மன நலம் இல்லாதவர்' என கடுமையாக விமர்சித்து சர்ச்சையில் சிக்கினார்.
வரலாறு முக்கியம்....
மற்றொரு சமயத்தில் காங்கிரஸ் கட்சியினர் மோடியை ‘வரலாறு தெரியதாவர்' எனக் குற்றம் சாட்டினர்.