"டைவர்ஸுக்கு" நாங்க ரெடி.. காங்கிரஸுக்கு குடைச்சல் தரும் தேசியவாத காங்.!

தொகுதிப் பங்கீடு தொடர்பாக ஒரு பார்முலாவை காங்கிரஸுக்குக் கொடுத்துள்ள தேசியவாத காங்கிரஸ், இன்றைக்குள் தனது முடிவை காங்கிரஸ் சொல்ல வேண்டும் என்றும் மிரட்டல் விடுத்துள்ளது.

இதுகுறித்து தேசியவாத காங்கிரஸ் தலைவர் பிரபுல் படேல் கூறுகையில், நிலைமை சிக்கலாகவே உள்ளது. அவர்கள் முடிவெடுக்க வேண்டும். இன்றைக்குள் எடுத்தால் நல்லது என்றார் அவர்.

உண்மையில் காங்கிரஸுடன் கூட்டணி தொடரவே தேசியவாத காங்கிரஸ் விரும்புகிறதாம். ஆனால் காங்கிரஸ் பிடிவாதம் பிடித்தால் தனித்துப் போட்டியிடவும் அது தயாராகி விட்டதாம்.

கடந்த சட்டசபைத் தேர்தலில் காங்கிரஸ் கட்சி 174 தொகுதிகளிலும், கூட்டணிக் கட்சியான தேசியவாத காங்கிரஸ் 114 சீட்களிலும் போட்டியி்ட்டன. ஆனால் இந்த முறை 144 தொகுதிகளில் போட்டியிட தேசியவாத காங்கிரஸ் விரும்புகிறதாம்.

தேசியவா காங்கிரஸின் இந்த கிராக்கிக்கு லோக்சபா தேர்தல் முடிவுதான் காரணம். லோக்சபா தேர்தலில் காங்கிரஸ் 2 இடங்களில் மட்டுமே வென்றது. ஆனால் தேசியவாத காங்கிரஸ் 4 இடங்களில் வென்றது என்பது நினைவிருக்கலாம்.

ஆனால் கடந்த முறை போட்டியிட்ட அதே 174 தொகுதிகளில் போட்டியிடுவோம். ஒரு தொகுதியைக் கூட குறைக்க மாட்டோம் என்று காங்கிரஸ் கூறி விட்டது. இதனால் சிக்கல் நீடிக்கிறது.

அதேசமயம், தேவைப்பட்டால் 124 தொகுதிகள் வரை தேசியவாத காங்கிரஸுக்குத் தர முன்வருவோம் என்றும் காங்கிரஸ் தரப்பில் கூறப்படுகிறதாம். இதை தேசியவா காங்கிரஸ் ஏற்கவில்லை.