சீனாவில் மீண்டும் பரவுகிறது ‘பிளேக்’... நோய்த் தாக்குதலுக்குள்ளான யூமென் நகருக்கு சீல்!

வடமேற்கு சீனாவின் கான்சூ மாகாணத்தில் யூமென் என்ற நகரில் கொடிய பிளேக் நோய் மக்களை தாக்கியுள்ளது. இந்த நோய்க்கு கடந்த வாரம் ஒருவர் உயிரிழந்தார்.

மேலும், 151 பேர் நோய்த் தாக்குதலுக்கு ஆளாகி மருத்துவமனையில் சிகிச்சைப் பெற்று வருகின்றனர். எனவே அங்கு நோய் தடுப்பு நடவடிக்கைகள் மேற்கொள்ளப்பட்டுள்ளன.

பிளேக் நோய் பரவியுள்ள யூமென் நகரத்தில் சுமார் 30 ஆயிரம் மக்கள் வசிக்கின்றனர். இது ஒரு தொற்று நோய் என்பதால் இந்த நகரத்து மக்கள் வெளியூர்களுக்குச் செல்ல தடை விதிக்கப்பட்டுள்ளது. அதே போன்று வேறு பகுதிகளில் இருந்தும் இந்நகரத்துக்கு மக்கள் வர தடை விதிக்கப் பட்டுள்ளது.

யூமென் நகரின் எல்லைகள் அடைக்கப்பட்டுள்ளன. முக்கியமான பிரதான சாலைகளையும் போலீசார் அடைத்து வைத்துள்ளனர். எனவே, யூமென் நகரைத் தாண்டி செல்பவர்கள் வேறு மாற்றுப்பாதையில் செல்ல அறிவுறுத்தப்பட்டுள்ளனர்.

மொத்தத்தில் யூமென் நகரம் முற்றிலும் சீல் வைக்கப்பட்டுள்ளது. இத்தகவலால் சீனாவின் மற்றப் பகுதி மக்களும் அதிர்ச்சிக்கு ஆளாகியுள்ளனர்.