லண்டனில் விருது வாங்கிய கையோடு பார்க்கிங் அபராதம் கட்டிய ஹிலாரி கிளிண்டன்

லண்டனில் செயல்படும் சத்தாம் ஷவுஸ் நிறுவனம், அமெரிக்காவின் ராஜதந்திர செயல்பாடுகளில் ஒரு புதிய சகாப்தத்தை உருவாக்கியதற்காக ஹிலாரி கிளிண்டனைப் பாராட்டி விருது வழங்கும் நிகழ்ச்சி ஒன்றிற்கு ஏற்பாடு செய்திருந்தது.

மத்திய லண்டனில் உள்ள செயின்ட் ஜேம்ஸ் சதுக்கத்திற்கு அருகே ஏற்பாடு செய்யப்பட்டிருந்த இந்த நிகழ்ச்சிக்கு தனது பரிவாரங்களுடன் வந்தார் ஹிலாரி கிளிண்டன். தான் பயணம் செய்து வந்த மெர்சிடிஸ் காரை அருகில் நிறுத்திவிட்டு விழா நிகழ்ச்சிகளுக்குச் சென்றுவிட்டார் ஹிலாரி.

பொதுவாக அங்கு காரை நிறுத்துவதற்கு ஒரு மணி நேரத்திற்கு 3.30 பவுண்டு கட்டணம் செலுத்தவேண்டும். ஆனால், அவருடன் வந்த யாரும் இந்தக் கட்டணத்தைச் செலுத்தவில்லை எனத் தெரிகிறது.

விருது வாங்கிய பின், வெளியே வந்த ஹிலாரி காரில் ஏற முற்பட்ட போது, அங்கு காவலில் இருந்த போக்குவரத்துக் காவலர் 80 பவுண்டு அபராதம் செலுத்துமாறு கூறியுள்ளார்

ஹிலாரியின் கார் அங்கு 45 நிமிடங்கள் நின்றிருந்ததாகவும், அதற்குரிய அபராதக் கட்டணமே இது என வெஸ்ட்மினிஸ்டர் நகரசபையின் உறுப்பினரான டேனியல் அஸ்டைர் கூறியுள்ளார். மேலும், உலக அளவில் பிரபலமானவராக இருப்பினும் அனைவருக்கும் விதிமுறைகள் பொதுவானவையே என்றும் அவர் தெரிவித்துள்ளார்.

அதோடு, இந்த அபராதத் தொகையை 14 நாட்களுக்குள் கட்டினால் இந்தத் தொகை பாதியாக அதாவது 40 பவுண்டாகக் குறைக்கப்படும் என்றும் அறிவிக்கப்பட்டுள்ளாது.