கூண்டு கோழி முட்டைகளை ஆஸ்திரேலியாவில் பயன்படுத்த மாட்டோம்: மெக் டொனால்ட் அறிவிப்பு

கோழிகள் கூண்டில் அடைத்து வைத்து சித்திரவதைக்கு உள்ளாக்கப்பட கூடாது, கோழிகள் சுதந்திரமாக நடத்தப்பட வேண்டும் என்பது விலங்கு நல ஆர்வலர்கள் கோரிக்கையாக இருந்து வருகிறது.

போராட்டத்தின் ஒரு பகுதியாக கூண்டில் அடைக்கபப்படும் கோழிகளில் இருந்து பெறப்படும் முட்டைகளை பயன்படுத்தும் மெக் டொனால்ட் நிறுவனத்தின் மீதும் அவர்களின் கோபப்பார்வை திரும்பியது.

இந்நிலையில், ஆஸ்திரேலியாவில், படிப்படியாக இதுபோன்ற கோழிகளில் இருந்து பெறப்படும் முட்டைகளின் பயன்பாட்டை நிறுத்திக்கொள்ள போவதாக மெக் டொனால்ட் நிறுவனம் அறிவித்துள்ளது.

இன்னும் மூன்றாண்டுகளில், அதாவது 2017ம் ஆண்டுக்குள் ஆஸ்திரேலியாவிலுள்ள மெக் டொனால்ட் உணவகங்களில் கூண்டில் அடைத்து வைக்கப்படும் கோழிகளின் முட்டை பயன்பாட்டை தவிர்த்துவிடுவதாக மெக்டொனால்ட் அறிவித்துள்ளது.

இந்த அறிவிப்பை 'அனிமல் ஆஸ்திரேலியா' அமைப்பு வரவேற்றுள்ளது. பிற உணவகங்களும் இதே போன்ற நடைமுறையை பின்பற்ற வேண்டும் என்று அந்த அமைப்பு கோரிக்கைவிடுத்துள்ளது.

ஆஸ்திரேலியாவில் ஆண்டுக்கு 91 மில்லியன் முட்டைகளை பயன்படுத்துகிறது மெக் டொனால்ட். ஏற்கனவே மெக் டொனால்ட் ஐரோப்பாவில் கூண்டு கோழி முட்டைகளை பயன்படுத்துவதை நிறுத்தி விட்டது குறிப்பிடத்தக்கது.