அதிநவீன சிறப்பம்சங்களுடன்... அமெரிக்காவில் புதிய 100 டாலர் நோட்டு வெளியீடு

அமெரிக்காவில், கடந்த பத்து ஆண்டுகளில், ஒரு டாலர் மற்றும் இரண்டு டாலர் நோட்டுகளைத் தவிர மற்ற அனைத்து மதிப்பிலும் உள்ள நோட்டுகள் கள்ளத்தனமாக அச்சடிக்கப்படுவதைத் தடுக்கும் வகையில் மறுவடிவமைப்பு செய்யப்பட்டு வருகின்றன.

பொதுமக்கள் இந்த புதிய நோட்டை அங்கீகரிப்பதற்கு எளிதாகவும், நகலெடுக்க முற்படும்போது கடினமாகவும் விளங்கக்கூடிய வகையில் இதில் சில சிறப்பு அம்சங்கள் உள்ளன.

ஒரு நீல, 3-டி பாதுகாப்பு நாடா, நோட்டை அசைக்கும்போது செப்பு நிறத்திலிருந்து பச்சை நிறத்திற்கு மாறும் தன்மை கொண்ட மையினால் அச்சடிக்கப்பட்ட எழுத்துகள் போன்றவை இந்த புதிய டாலர் நோட்டின் பாதுகாப்பு அம்சங்களாகும்.

நோட்டின் பின்புறமுள்ள பெரிய எண்ணான 100லும் இந்தக் கலர் மாற்றம் ஏற்படும் தன்மை, முன்புறமுள்ள 100 என்ற எண்ணிலும் தோன்றும் இந்தக் கலர் மாற்றம் போன்றவை இந்தப் புதிய நோட்டின் சிறப்பம்சங்களாகும்.

மற்ற டாலர் நோட்டுகளைப் போலவே, அமெரிக்க மூத்தத் தலைவரான பெஞ்சமின் பிராங்க்ளினின் படம் புதிய நோட்டிலும் அச்சிடப்பட்டிருக்கிறது. ஆனால் பழைய டாலர் நோட்டுகளில் அவரைச் சுற்றி இருக்கும் ஓவல் வடிவம் இந்தப் புதிய நோட்டில் காணப்படாது என்பது குறிப்பிடத்தக்கது.