சவூதியில் 5 வயது மகளை சீரழித்துக் கொன்ற முஸ்லிம் போதகருக்கு 8 ஆண்டு சிறை, 800 சவுக்கடி
ரியாத்: சவூதியில் 5 வயது மகளை பாலியல் பலாத்காரம் செய்து, அடித்துக் கொன்ற இஸ்லாமிய போதகருக்கு 8 ஆண்டு சிறை தண்டனை கிடைத்துள்ளது.
சவூதியைச் சேர்ந்தவர் பிரபல இஸ்லாமிய போதகர் பஹ்யான் அல் கம்தி. அவர் அடிக்கடி தொலைக்காட்சியில் தோன்றுவார். அவர் தனது 5 வயது மகள் லாமா அல் கம்தியை பலமுறை பாலியல் பலாத்காரம் செய்தார். மேலும் லாமாவை அவர் தாக்கியதில் சிறுமி படுகாயம் அடைந்தார்.
மருத்துவமனையில் சேர்க்கப்பட்ட சிறுமி சிகிச்சை பலனின்றி கடந்த ஆண்டு நவம்பர் மாதம் பலியானார். இதையடுத்து சில மாதங்கள் சிறையில் இருந்த பஹ்யான் லாமாவின் தாய்க்கு ரூ. 2,661,282 பணம் கொடுத்துவிட்டு வெளியே வந்துவிட்டார்.
இந்நிலையில் இந்த வழக்கில் பஹ்யானுக்கு 8 ஆண்டுகள் சிறை தண்டனையும், 800 சவுக்கடியும் தண்டனையாக கிடைத்துள்ளது என்று அதிகாரப்பூர்வ சவூதி செய்தி இணையதளத்தில் தெரிவிக்கப்பட்டுள்ளது.