எங்கு பார்த்தாலும் கொன்று குவிப்போம், ரத்தத்தில் மூழ்கடிப்போம்.. அமெரிக்காவுக்கு ஐஎஸ்ஐஎஸ் எச்சரிக்கை

வடக்கு ஈராக்கில், அமெரிக்க விமானப்படையினர் தொடர் விமானத் தாக்குதலில் ஈடுபட்டதன் மூலம் அங்கு யாஸிதி சிறுபான்மையினரை மீட்க முடிந்தது. மேலும் குர்திஷ் படையினரும் தற்போது அங்கு வலுப்பெற்று விட்டனர். தீவிரவாதிகள் பிடித்த சில நகரங்களையும் குர்திஷ் படையினர் மீட்டுள்ளனர்.

ஐஎஸ்ஐஎஸ் தீவிரவாதிகள் அப்பாவி ஈராக்கியர்களையும் ஈராக் படையினரையும் கொடூரமாக கொன்று குவித்தபோதெல்லாம் உதவிக்கு வரவில்லை அமெரிக்கா. ஈராக் அரசு பலமுறை கோரிக்கை விடுத்தும் கூட வரவில்லை. ஆனால் வடக்கு ஈராக்கில், கிறிஸ்தவர்கள் மற்றும் யாஸிதி சிறுபான்மையினர் தீவிரவாதிகளிடம் சிக்கி படுகொலைக்கு ஆளானதும் அமெரி்க்கா தனது விமானப்படையினரை அனுப்பி தாக்குதலில் ஈடுபடுத்தியது.

இருப்பினும் ஈராக்கின் பல பகுதிகளையும், சிரியாவில் சில பகுதிகளையும் தீவிரவாதிகள் கைப்பற்றியுள்ளனர். தொடர்ந்து முன்னேறியும் வருகின்றனர். இதனால் அமெரிக்கா தனது தாக்குதலை விரிவுபடுத்தலாம் என்று எதிர்பார்க்கப்படுகிறது.

இதையடுத்தே தீவிரவாதிகள் அமெரிக்காவை கடுமையாக எச்சரித்துள்ளனர். இதற்கிடையே திங்கள்கிழமை செய்தியாளர்களிடையே பேசிய அதிபர் பராக் ஒபாமா, ஈராக்குக்கும், ஒட்டுமொத்த பிராந்தியத்திற்கும் மிகப் பெரிய மிரட்டலாக ஐஎஸ்ஐஎஸ் உருவெடுத்துள்ளதாக தெரிவித்தார்.