அப்பாடா... தூத்துக்குடி மேயர் தேர்தலில் ஜாஸ்தி வாக்குகளில் வென்ற அதிமுக...கட்சியினர் நிம்மதி!

இதனால் பல இடங்களில் அதிமுகவை போட்டியின்றி வெல்ல வைக்க பல முயற்சிகளில் கட்சியினர் இறங்கினர். இதனால் நெல்லை மாநகராட்சி பாஜக வேட்பாளர் வெள்ளையம்மாள் பல்டி அடித்து அதிமுகவுக்கு ஆதரவாக மாறினார். இதனால் அங்கு போட்டியின்றி அதிமுக வென்றது.

ஆனால் தூத்துக்குடியில் அதிமுகவினர் கோட்டை விட்டு விட்டனர். அங்கு பாஜக வேட்பாளர் ஜெயலட்சுமி விலை போக மறுத்து விட்டதால் போட்டி நடப்பது உறுதியாகி வாக்குப்பதிவும் நடந்தது. தற்போது ஜெயலட்சுமி அதிக வாக்குகளைப் பெற்று விடக் கூடாதே என்ற பதைபதைப்பில் அதிமுகவினர் இருந்து வந்தனர்.

இந்த நிலையில் இன்று நடந்த வாக்கு எண்ணிக்கையில், அதிமுக வேட்பாளர் அந்தோணி கிரேஸி, பாஜக வேட்பாளர் ஜெயலட்சுமியை விட 84,885 வாக்குகள் வித்தியாசத்தில் வெற்றி பெற்றுள்ளார். இது கடந்த தேர்தலை விட அதிக வாக்கு வித்தியாசமாகும்.

கடந்த மேயர் தேர்தலில் அதிமுக வேட்பாளர் சசிகலா புஷ்பா, தி.மு.க. வேட்பாளர் பொன் இனிதாவைவிட 21 ஆயிரத்து 256 வாக்குகள் அதிகம் பெற்று வெற்றி பெற்றார். இந்த முறை அதை தாண்டியுள்ளார் கிரேஸி. கடந்த தேர்தலை விட அ.தி.மு.க.வுக்கு 53 ஆயிரத்து 543 ஓட்டுகள் அதிகம் கிடைத்துள்ளது குறிப்பிடத்தக்கது.

இதேபோல கோவையிலும் வாக்கு வித்தியாசம் தாண்டியுள்ளது. கடந்த முறையை விட இந்த முறை சூப்பரான வாக்கு வித்தியாசத்தில் அங்கு அதிமுக வென்றுள்ளது.

கடந்த மேயர் தேர்தலில் கோவையில், அதிமுக வேட்பாளர் செ.ம. வேலுச்சாமி 1.27 லட்சம் வாக்குகள் வித்தியாசத்தில் வென்றார். ஆனால் தற்போதைய தேர்தலில் அதிமுக வேட்பாளர் கணபதி ப.ராஜ்குமார் 2 லட்சத்து 91 ஆயிரத்து 334 வாக்குகள் வித்தியாசத்தில் வென்று அசத்தியுள்ளார்.

கோவையில் மட்டுமல்லாமல் பிற பகுதிகளிலும் கூட வாக்குப் பதிவு குறைவாகவே இருந்தது. இதற்குக் காரணம், மக்களிடம் இந்தத் தேர்தல் குறித்து ஆர்வம் இல்லாமல் போனதுதான்.

உள்ளாட்சி இடைத் தேர்தலில் கிராமப்புறங்களில் 67.99 சதவீத வாக்குகள் பதிவாகியிருந்தன. நகர்ப்புறங்களில் அதை விட குறைவாக அதாவது 63.57 சதவீத வாக்குகள் பதிவாகியிருந்தன. இதுதான் அதிமுகவை கவலைக்குள்ளாக்கியுள்ளது.