மோடி கட்டிய வேட்டி.. 'ஐடியா' கொடுத்த தமிழிசை, வானதி!!

சென்னையில் நேற்று நடந்த பாஜக பொதுக் கூட்டத்தில் மோடி கலந்து கொண்டு பிரசாரம் செய்து பேசினார். அப்போது அவர் தமிழக ஆண்களின் பாரம்பரிய உடையான வேட்டியில் காட்சி தந்தார்.

இதற்கு முன்பு இருமுறை அவர் தமிழகத்திற்கு வந்த போதும் அப்போது அவர் வேட்டி கட்டியிருக்கவில்லை. நேற்றுதான் முதல் முறையாக வேட்டி கட்டியிருந்தார்.

இன்று தமிழ்ப் புத்தாண்டு கொண்டாடப்படுவதால் அவர் வேட்டிக்கு மாறியிருக்கலாம் என்று கூறப்படுகிறது.

நேற்று மோடி கட்டிய வேட்டிக்குப் பின்னால் ஒரு கதை உள்ளதாம். அதாவது தமிழகத்தைச் சேர்ந்த இரண்டு பெண் தலைவர்கள்தான் இந்த வேட்டி ஐடியாவைக் கொடுத்தவர்களாம்.

அதாவது தேசிய செயலாளர் டாக்டர் தமிழிசையும், வானதி சீனிவாசனும்தான் மோடி சென்னை கூட்டத்திற்கும், ரஜினி சந்திப்புக்கும் வேட்டி கட்டலாம் என்று ஐடியா கொடுத்தவர்களாம்.

ஆண்களுக்கு வேட்டி கட்டி அழகு பார்ப்பவர்கள் தமிழகப் பெண்கள். எனவே மோடியும் வேட்டியில் வந்தால், தமிழகப் பெண் வாக்காளர்களைக் கவர முடியும் என்ற எண்ணத்தில் இந்த ஐடியாவை தமிழிசையும், வானதியும் கொடுத்திருக்கலாம் என்று தெரிகிறது.

அடுத்து மோடி அணிந்திருந்தது ராம்ராஜ் வேட்டியா என்று யாராவது வேட்டி மன்றம்.. அதாவது பட்டி மன்றம் வைத்துப் பேசினாலும் பேசலாம்.