தேமுதிக வ.செ. முதுகில் கடித்து விளையாடிய காங்கிரஸ்காரர்!

Published: Thursday, April 17, 2014, 17:27 [IST]

புதுக்கோட்டை: தேமுதிகவைச் சேர்ந்த வட்டச் செயலாளர் அலெக்ஸ் என்பவருடன் ஏற்பட்ட மோதலில் அவரது முதுகில் பலமாக கடித்து விட்டார் காங்கிரஸ் கட்சியைச் சேர்ந்த செல்வம் என்பவர். இதில் அலெக்ஸ் முதுகில் பல் பதிந்து காயமாகி விட்டது.

அவரைக் கொண்டு போய் தற்போது மருத்துவமனையில் சேர்த்துள்ளனர்.

ராமநாதபுரம் தொகுதியில் பாஜக சார்பில் போட்டியிடும் குப்புராமு புதுக்கோட்டை மாவட்டம் அறந்தாங்கியில் பிரசாரம் செய்ய வருவதாக அறிவிப்பு வெளியானது. இதையடுத்து கூட்டணிக் கட்சியான தேமுதிக வட்ட செயலாளர் அலெக்ஸ் என்பவர், களப்பக்காடு பகுதியில் பாரதிய ஜனதா மற்றும் தேமுதிக கொடி தோரணங்களை கட்சியினருடன் சேர்ந்து கட்டினார்.

இதற்கு அப்பகுதியை சேர்ந்த காங்கிரஸ் பிரமுகர்கள் செல்வம் மற்றும் பிரகாஷ் எதிர்ப்பு தெரிவித்தனர். இதனால் 2 தரப்பினருக்கும் தகராறு ஏற்பட்டது. இதில் சண்டை அடிதடியானது. அப்போது செல்வம் அலெக்சை தாக்கி முதுகில் கடித்து விட்டார்.

பதிலுக்கு செல்வம் மற்றும் பிரகாஷை தேமுதிகவினர் அடித்து விட்டனர். இரு தரப்பும் காயமடைந்தது. முதுகில் காயமடைந்த அலெக்ஸை வேட்பாளர் குப்புராமு மருத்துவமனையில் வந்து ச்ந்தித்து நலம் விசாரித்தார்.

முன்னாடியெல்லாம் அடிச்சுக்குவாங்க.. இப்ப கடிக்கவே ஆரம்பிச்சு்டடாங்களே.. அரசியல் ரொம்பத்தான் சூடாயிருச்சு போல.