"தொட்ட இடம் துலங்க வரும் தாய்க்குலமே வருக" ... "ஜெ ஜெ" என ஜொலிக்கும் மதுரை!

மதுரை உள்வட்டச்சாலை பாண்டிகோவில் அருகில் பிரமாண்ட பந்தல் அமைக்கப்பட்டுள்ளது. 7 லட்சம் பேர் உட்காரும் வகையில் பந்தலில் இருக்கைகள் போடப்பட்டுள்ளன.

கோட்டை வடிவிலான முகப்பு அமைக்கப்பட்டு, பெரியாறு அணை போன்று மாதிரி வடிவமும் மிகப்பெரியஅளவில் உருவாக்கப்பட்டு இருக்கிறது. இரவை பகலாக்கிடும் வகையில் விளக்குகள் போடப்பட்டுள்ளன.

பாராட்டு விழா மாலை 4.30 மணியளவில் தொடங்குகிறது. விழாவுக்கு கம்பம் பள்ளத்தாக்கு நீரினை பயன்படுத்துவோர் சங்க நிர்வாக உறுப்பினர் கிருஷ்ணமூர்த்தி தலைமை தாங்குகிறார். வைகை பாசன விவசாயிகள் சங்க ராமநாதபுரம் மாவட்ட செயலாளர் மதுரைவீரன், தமிழக விவசாயிகள் சங்க மதுரை மாவட்ட செயலாளர் பனையூர் அழகுசேர்வை, அகில இந்திய பார்வர்டுபிளாக் தமிழ் மாநிலச் செயலாளர் பி.வி.கதிரவன் எம்.எல்.ஏ. ஆகியோர் முன்னிலை வகிக்கிறார்கள். பெரியாறு பாசன விவசாயிகள் சங்க பகிர்மானக்குழு தலைவர் அருள்பிரகாசம் வரவேற்றுப் பேசுகிறார்.

முதல்வர் வருவதையொட்டி அவரை வரவேற்கும் வரவேற்பு பேனர்கள் மதுரை முழுவதும் நீக்கமறக் காணப்படுகின்றன.

இதுதவிர விழா நடக்கும் இடம் உள்பட நான்கு இடங்களில் முதல்வரம் முகம் பதித்த நான்கு ராட்சத ஹாட் ஏர் பலூன்களும் பறக்க விடப்பட்டுள்ளன.