உங்கள் எதிர்காலக் கனவுகளுக்கு ஆதரவு... நடிகர் விஜயிடம் மோடி செய்த ’பிராமிஸ்’

சினிமாவில் வெற்றித் தடம் பதிக்க ஆரம்பித்த நாளிலேயே விஜய்குள் அரசியல் விதை விழுந்துவிட்டது எனக் கூறலாம். அதன் வெளிப்பாடு தான், ‘மக்கள் இயக்கம்'.

விஜயின் வளர்ச்சியில் அவரது அப்பாவின் பங்கும் அளப்பரியாதது. ஏனெனில் மக்கள் இயக்கம் என்ற பெயரில் இயங்கிய ரசிகர் மன்றத்தை, அவரை விட அவருடைய அப்பா இயக்குனர் எஸ்.ஏ. சந்திரசேகரன் ஆர்வத்துடன் நடத்தினார்.

விஜய் ரசிகர் மன்றத்தை பலப்படுத்துவதன் மூலம், எதிர்காலத்தில் தான் நடிக்கும் படங்களை ஓட வைக்க முடியும், பிற்காலத்தில் அரசியல் செல்வாக்கை கூட்டிக் கொள்ளலாம் என கணக்குப் போட்டனர்.

இதற்கிடையே கடந்த தி.மு.க., ஆட்சியில் 'காவலன்' படத்தை வெளியிடுவதில் சிக்கல் உண்டானது. வேறொரு முக்கிய படத்திற்காக தியேட்டர்கள் ஆக்கிரமிக்கப் பட்டு விட தியேட்டர் கிடைக்காமல் திணாடினார் விஜய்.

இது தொடர்பாக நண்பன் என்ற முறையில் இத்தகவலை உதயநிதி ஸ்டாலினிடம் கொண்டு போனார் விஜய். ஆனால், அவர் கைவிரித்து விட்டார்.

இதனால், தி.மு.க.,மீது, விஜய்க்கும், அவருடைய அப்பாவுக்கும் கோபம் உண்டாக டெல்லி சென்று ராகுலைச் சந்தித்தனர். ஆனால், அச்சந்திப்பும் பரபரப்பு இல்லாமல் அடங்கிப் போனது.

இதற்கிடையே 2011ம் ஆண்டுத் தேர்தலில் பத்துத் தொகுதிகள் கேட்டு அதிமுகவை அணுகியது மக்கள் இயக்கம். ஆனால், அதுவும் கிடைக்கவில்லை. ஆனபோதும், சில நகரங்களில் மக்கள் இயக்கத்தின் சார்பில் கூட்டம் போட்டு, அ.தி.மு.க., வுக்கு ஆதரவாக பிரசாரம் செய்தார் விஜய்.

எதிர்பார்த்தபடியே, அ.தி.மு.க., தரப்பு அமோக வெற்றிடைந்துவிட, இந்த வெற்றி விஜயால் தான் கிடைத்தது என்பது போல, போஸ்டர் அடித்து ஒட்டினர், ரசிகர் மன்றத்தினர். இதனால், அ.தி.மு.க., மேலிடத்துக்கு விஜய் மற்றும் அவரது அப்பா மீது கடும் கோபம் ஏற்பட்டது.

இந்நிலையில், விஜய் நடித்த, 'தலைவா' படத்தில் ‘டைம் டூ லீட்' என்ற வாசகம் இடம் பெற்றது. அதாவது 'தலைவராவதற்கு, ஏற்ற தருணம் இது' என்ற பொருளில். கூடவே, படத்தில் ஜெயலலிதாவுக்கு எதிராக, 'பஞ்ச்' வசனங்கள் நிறைய உள்ளதாகவும் செய்தி பரவியது. இதனால், படம் ரிலீசாவதில் சிக்கல் ஏற்பட்டது.

இந்நிலையில் படம் ரிலீசானால், தியேட்டர்களில் குண்டு வெடிக்கும் என, யாரோ எழுதிப் போட்ட மொட்டை கடிதத்தை வைத்து, அரசு தரப்பில் பாதுகாப்பு ஏற்பாடு செய்ய மாட்டோம் என சொல்ல, சிக்கலில் ஆழ்ந்தார் விஜய்.

நீண்ட இழுபறிக்கு பின், படம் ரிலீசாகி, தோல்வியை தழுவியது. அதன் பிறகு, அரசியல் ரீதியாக அமைதியான விஜயின் அடுத்த படமான 'ஜில்லா' எதிர்பார்த்த அளவில் பெரிய வெற்றியைப் பெறவில்லை. இப்போது, 'கத்தி' என்ற படத்தில் நடித்து வருகிறார்.

முந்தைய படங்களின் தொடர் தோல்விகளால் துவண்டிருந்த விஜய், மோடியை கோவையில் சந்தித்தார். மோடி எப்படியும் பிரதமராகி விடும்பட்சத்தில், இங்கு அதிகாரத்தில் இருப்பவர்களால், பெரிய அளவில் பிரச்னைகளும் இருக்காது என, சொல்லி, கேப்டன் தான் இந்தச் சந்திப்புக்கு ஏற்பாடு செய்திருக்கிறார் எனச் சொல்லப்படுகிறது.

இது ஒருபுறம் இருக்க, வரும் 2016 சட்டசபை தேர்தலை மனதில் வைத்து, விஜய், இப்போதே ஆட்டத்தை ஆரம்பித்து விட்டார் எனவும் கருத்து நிலவுகிறது. அதாவது லோக்சபா தேர்தல் முடிவுகளைப் பொறுத்து அவர் பா.ஜ.கவில் இணைந்து விடுவார் என எதிர்பார்க்கப் படுகிறது.

அது நடக்காத பட்சத்தில் மக்கள் இயக்கத்தை வலுப்படுத்தி, பா.ஜ.,வோடு கூட்டணி அமைத்து, போட்டியிடுவார் அல்லது, தே.மு.தி.க.,வுடன் கூட்டணி அமைத்துக் கொள்வார் என பலவித யூகங்கள் உலா வருகின்றன.

'உங்கள் எதிர்கால கனவுகளுக்கு ஆதரவாக இருப்பேன்' என, விஜயிடம் மோடி சொன்னதன் அர்த்தம் என்ன என்பதை, தேர்தல் முடிவுகளுக்கு பின் நடக்கப் போகும் அரசியல் நிகழ்வுகள் உணர்த்தும் என எதிர்பார்க்கலாம்.