நலம் விசாரிக்க மட்டுமே விஜயகாந்தைச் சந்தித்தேன் - நெப்போலியன்
சென்னை: தேமுதிக தலைவர் விஜயகா்த்தும், நானும், கட்சிக்கு அப்பாற்பட்டு நண்பர்கள். எனவே நலம் விசாரிக்க மட்டுமே விஜயகாந்த்தைச் சந்தித்தேன் என்று நடிகரும், முன்னாள் மத்திய அமைச்சருமான நெப்போலியன் கூறியுள்ளார்.
தேமுதிக தலைவர் விஜயகாந்தை இன்று அவரது அலுவலகத்தில் சந்தித்து நலம் விசாரித்தார் முன்னாள் மத்திய அமைச்சரும் நடிகருமான நெப்போலியன். உடல் சுகவீனமடைந்த தேமுதிக தலைவர் விஜயகாந்த், சிகிச்சைக்குப் பிறகு இப்போது தேறி வருகிறார். கட்சி நிகழ்ச்சிகளில் பங்கேற்க ஆரம்பித்துள்ளார்.
விஜயகாந்தை கட்சித் தலைவர்கள், திரையுலகப் பிரமுகர்கள் சந்தித்து நலம் விசாரித்து வருகின்றனர். திமுக பிரமுகர் ஜெ அன்பழகன் சில தினங்களுக்கு முன் விஜயகாந்தைச் சந்தித்தது நினைவிருக்கலாம்.
நடிகரும் முன்னாள் மத்திய அமைச்சருமான நெப்போலியன், நேற்று முன்தினம்தான் அமெரிக்காவிலிருந்து சென்னைக்கு வந்தார். இன்று காலை அவர் விஜயகாந்தைச் சந்தித்தார்.
இந்த சந்திப்பு குறித்து நெப்போலியன் நம்மிடம் பேசுகையில், "கட்சிக்கு அப்பாற்பட்ட நண்பர்கள் நானும் விஜயகாந்தும். அவருக்கு உடல் நலக் குறைவு என்று கேள்விப்பட்டு இன்று சந்திக்கப் போனேன். இருவரும் ஒரு மணி நேரம் பேசிக் கொண்டிருந்தோம். இது நலம் விசாரிப்புக்கான சந்திப்பு மட்டும்தான்," என்றார்.
கடந்த மன்மோகன் சிங் அமைச்சரவையில் மத்திய சமூகநீதி மற்றும் ஆற்றல் மேம்பாட்டு துறையின் இணை அமைச்சராக நெப்போலியன் பதவி வகித்தார் என்பது குறிப்பிடத்தக்கது.