மு.க. ஸ்டாலினின் பேஸ்புக், டுவிட்டர் பக்கங்கள் நவீன வசதிகளுடன் புதிய வடிவமைப்பு
சென்னை: நேற்று தனது 62வது பிறந்தநாளைக் கொண்டாடிய திமுக பொருளாளர் மு.க.ஸ்டாலின் தனது இணையதளம், பேஸ்புக் மற்றும் டுவிட்டர் பக்கங்களை புதிய வடிவமைப்பு செய்துள்ளார்.
இது தொடர்பாக தி.மு.க. தலைமை கழகம் சார்பில் வெளியிடப்பட்ட செய்திக்குறிப்பில் கூறியிருப்பதாவது :-
தி.மு.க பொருளாளர் மு.க.ஸ்டாலின், தமிழக உள்ளாட்சித்துறை அமைச்சராகவும் பின்னர் தமிழகத்தின் துணை முதல்வராகவும் பொறுப்பேற்றிருந்தபோதே, தன்னை பொதுமக்கள் எளிதாக அணுகும் வகையிலும், அவர்களின் கோரிக்கைகளை நிறைவேற்றும் வகையில் தனக்கான அதிகாரப்பூர்வ இணையதளத்தை தொடங்கி அதன் வழியாக பல்வேறு செயல்பாடுகளை மேற்கொண்டு வந்ததை தமிழகம் அறியும். தற்போது வளர்ந்துள்ள நவீன தொழில்நுட்பத்திற்கேற்ப மு.க.ஸ்டாலின் இணையதளம் www.mkstalin.in புதிய வடிவமைப்பினை பெற்று, அவருடைய பிறந்தநாளான இன்று (நேற்று) அவராலேயே தொடங்கி வைக்கப்பட்டு உள்ளது.
தி.மு.க. வரலாறு, தி.மு.க. தலைவர் கருணாநிதியின் பல்துறை சாதனைகள், மு.க.ஸ்டாலின் பொதுவாழ்வு, இளைஞரணியின் செயல்பாடுகள் உள்ளிட்ட பல செய்திகளும், அரிய புகைப்படங்களும் இத்தளத்தில் இணைக்கப்பட்டுள்ளன.
தங்களின் பிறந்தநாள், திருமண நாள், குடும்ப நிகழ்வுகள், தி.மு.க.விழாக்கள், பொதுநிகழ்ச்சிகள் குறித்து முன்கூட்டியே இதில் பதிவு செய்து மு.க.ஸ்டாலின் வாழ்த்துகளை பெறலாம். பொதுமக்களும், தி.மு.க.வினரும் தங்களின் புகைப்படங்களை இதில் பதிவு செய்து மு.க.ஸ்டாலினுக்கு பார்வைக்கு கொண்டு செல்லும் வாய்ப்பும் இதில் உருவாக்கப்பட்டுள்ளது.
மு.க.ஸ்டாலினுக்கு வாழ்த்துகள் தெரிவிப்பதற்கான வாய்ப்பும், அவருடன் ஃபேஸ்புக், டுவிட்டர் உள்ளிட்ட சமூக வலைத்தளங்களில் உரையாடுவதற்கான வசதியும் இந்த இணையதளத்தில் மேம்படுத்தப்பட்டுள்ளன.
இணையதளம் வாயிலாகவும், சமூகவலைத்தளங்கள் மூலமாகவும் மு.க.ஸ்டாலினிடம் கல்வி-மருத்துவ உதவிகளை பெற விரும்புகிறவர்கள் இவற்றை பயன்படுத்திக்கொள்ளலாம். பொதுவாழ்வில் 47 ஆண்டுகளாக தன்னை இணைத்துக்கொண்ட மு.க.ஸ்டாலின் நவீன தொழில்நுட்பங்கள் வாயிலாக பொதுமக்களுடனான உறவை வலுப்படுத்திக்கொள்ளும் நோக்குடன் இந்த இணையதளம் மேம்படுத்தப்பட்டுள்ளது.
இவ்வாறு அந்தச் செய்திக்குறிப்பில் தெரிவிக்கப்பட்டுள்ளது.