மோடிக்கு ரஜினி 'வாய்ஸ்' கொடுப்பாரா?, கொடுத்தாலும் எடுபடுமா?

தேர்தல் நேரத்தில் ரஜினி அல்லது ரஜினியை முன்வைத்து பரபரப்பு ஏற்படுவது வழக்கமானதுதான். 1995ஆம் ஆண்டு பிரதமராக இருந்த நரசிம்மராவை ரஜினிகாந்த் சந்தித்தார். அப்போது குமுதம் ஒரு கருத்து கணிப்பை வெளியிட்டது. ரஜினி ஆதரவுடன் தமிழக சட்டசபை தேர்தலை காங்கிரஸ் சந்தித்தால் 130 இடங்களைப் பெற முடியும் என்றது.

ஆனால் 1996ஆம் ஆண்டு நரசிம்மராவோ, அதிமுகவுடன்தான் கூட்டணி என்று அடம்பிடித்தார். வேறுவழியில்லாமல் மூப்பனார் தலைமையில் தமிழ் மாநில காங்கிரஸ் உதயமானது. அது திமுகவுடன் கூட்டணி வைத்து.

ரஜினிகாந்தும் திமுக- தமிழ் மாநில காங்கிரஸ் கட்சிக்கு வெளிப்படையாக வாய்ஸ் கொடுத்தார். "அதிமுக மீண்டும் ஆட்சிக்கு வந்தால் கடவுளால் கூட காப்பாற்ற முடியாது" என்பதுதான் அந்த வாய்ஸ். அதற்கு தமிழக மக்கள் மதிப்பும் அளித்து திமுக- தமிழ் மாநில காங்கிரஸ் அணியை வெல்ல வைத்தனர்.

1996,98ம் ஆண்டுகளில் லோக்சபா தேர்தல்களில் திமுக- த.மா.கா. அணிக்கே ரஜினிகாந்த் ஆதரவு கொடுத்தார்.

1999ஆம் ஆண்டு நடைபெற்ற லோக்சபா தேர்தலில் ரஜினி வாய்ஸ் கொடுக்காமல் அமைதியாக இருந்தார்.

2004ம் ஆண்டு பாரதிய ஜனதா கட்சிக்கு ஆதரவு தெரிவித்து வாய்ஸ் கொடுத்தார். ஆனால் பாஜக போணியாகவில்லை. அதன் பின்னர் வந்த தேர்தல்களில் வாய்ஸ் கொடுப்பதையே நிறுத்திவிட்டார்.

அதே நேரத்தில் ஒவ்வொரு தேர்தலின் போதும் ரஜினி ரசிகர்கள் கொந்தளிப்பது, ஆங்காங்கே கட்சி தொடங்குவது என்றெல்லாம் கூத்துகள் அரங்கேறும். இதையெல்லாம் ரஜினி பகிரங்மாகவே எதிர்த்து அறிக்கையும் வெளியிட்டபடி ஒதுங்கியே இருந்தார்.

இந்த நிலையில் 2011ம் ஆண்டு மே 16-ம் தேதி தமிழக முதல்வர் ஜெயலலிதாவின் பதவியேற்பு விழாவில் பங்கேற்க சென்னை வந்த மோடி, திடீரென போரூர் ராமச்சந்திரா மருத்துவமனைக்கு சென்று ரஜினியை சந்தித்து நலம் விசாரித்தார். அதன் பின்னர் ரஜினியுடனான தொடர்பை வலுப்படுத்திக் கொண்டது மோடிதான்.

அதே நேரத்தில் மோடி பேசுவது பற்றியெல்லாம் ரஜினி கண்டு கொள்ளவில்லை என்றே தெரிகிறது. ஏனெனில் ரஜினியை திமுக பொருளாளர் ஸ்டாலின், விடுதலை சிறுத்தைகள் கட்சித் தலைவர் தொல். திருமாளவன் என அனைத்து கட்சி தலைவர்களுமே சந்தித்து பேசுவது வழக்கமாக இருந்தது.

தேர்தல் நெருங்க நெருங்க மோடி- ரஜினி நட்பை வாக்காக பயன்படுத்த தமிழக பாஜக நிர்வாகிகள் முடிவு செய்தனர். இதனால் மோடி சென்னை வரும்போதெல்லாம் ரஜினியை சந்திக்கப் போகிறார் போகிறார் என்று சொல்லி வந்தனர்.

மோடி இதற்கு முன்பு திருச்சி, சென்னை வந்த போதெல்லாம் இப்படித்தான் செய்திகள் பரப்பப்பட்டு பொய்யாகிப் போகின. இந்தப் பின்னணியில் பார்த்தால் "வேறுவழியே" இல்லாமல் மோடியை சந்திக்க ரஜினி ஒப்புக் கொண்டதாகவே தற்போது தெரிகிறது.

அதுவும் மோடி சந்தித்த போதும் கூட அவர் முன்னிலையே "அரசியல் சந்திப்பு" இல்லை.. தனிப்பட்ட சந்திப்புதான் என்று பட்டும்படாமல் பேசி ஒதுங்கிக் கொள்ளத்தான் ரஜினி விரும்பியது வெளிப்படுத்துகிறது. ஆனால் தமிழக பாஜகவினர்தான் மோடியை சந்தித்துவிட்டதாலேயே தங்களுக்கே ஆதரவு என்று பேசி வருகின்றனர்.

அத்துடன் இன்னொரு கூத்தையும் வைகோ அரங்கேற்றி வைத்திருக்கிறார். மோடியை ஆதரிக்கக் கோரி போனவாரமே நான் ரஜினியை சந்தித்தேன் என்று அவரது அரசியல் இமேஜூக்கு சற்றும் பொருந்தாத ஒரு 'அரசியல்' கூத்தை நுழைத்துவிட்டிருக்கிறார்.

ரஜினிகாந்த் என்ற நடிகரின் ஆளுமை திரை உலகத்தில் நிலையானது.. எவரும் மறுக்கப் போவதில்லை.. ரஜினிகாந்த் என்ற நடிகர் அரசியலில் கோட்டை விட்ட இடத்தை விஜயகாந்த் என்ற நடிகர் பிடித்துக் கொண்டு வலம் வந்து கொண்டிருக்கிறார்.. இதை ரஜினி நன்றாகவே அறிந்திருப்பார்..

இதனால்தான் தேர்தல்களில் "வாய்ஸ்'" கொடுக்கும் வேலை எதுவும் அவர் செய்வதும் இல்லை.. அது எடுபடாமல் போனால் தனது செல்வாக்கை தானே சரிய வைத்தது மாதிரி ஆகிவிடும் என்பதை அறியாதவரல்ல ரஜினி..

அதனால் ரஜினி- மோடி; ரஜினி- வைகோ சந்திப்புகள் "சந்திப்புகள்" தானே தவிர சரித்திரத்தை புரட்டிப் போட்டுவிடும் ஒரு வரலாற்று சந்திப்பு அல்ல..