சும்மா பேசிக் கொண்டிருந்த ஞானதேசிகனை 'வாட்ஸ் ஆப்' மூலம் ராகுலிடம் போட்டுக் கொடுத்த எதிர் கோஷ்டி!

காங்கிரஸ் கட்சியின் பெரிய தம்பியாக அதாவது பெரிய கோஷ்டியாக இருப்பது ஜி.கே.வாசன் கோஷ்டிதான். அடுத்து ப.சிதம்பரம் கோஷ்டி, பிறகு அப்படியே நிறைய கோஷ்டிகள் இருக்கின்றன. இதில் தொண்டர்கள் அதிகம் இருப்பது வாசன் கோஷ்டிக்குத்தான்.

லோக்சபா தேர்தலுக்குப் பின்னர் தமிழக காங்கிரஸ் தலைவர் பதவியிலிருந்து ஞானதேசிகன் அகற்றப்படலாம் என்ற பேச்சு அடிபட்டு வருகிறது. ஆனால் மாற்றுத் தலைவராக யாரைப் போடுவது என்பதில் கட்சி மேலிடத்தால் ஒரு முடிவுக்கு வர முடியாத நிலை.

தலைவர் பதவிக்கு தற்போது ஏகப்பட்ட பேர் போட்டி போட்டுக் கொண்டிருக்கின்றனர். ஞானதேசிகனே தான் பதவியில் நீடிக்க முயற்சித்து வருகிறார். மறுபக்கம் ப.சிதம்பரம் தலைவர் பதவியைக் கேட்டுக் கொண்டிருக்கிறார். வசந்தகுமாரும் முட்டி மோதி வருகிறார். இப்படிப் பலரும் பம்பரமாக சுழன்று பதவியைப் பிடிக்க பரிதவித்து வருகின்றனர்.

இந்த நிலையில் கட்சித் தோல்வி குறித்து ஆராய்ந்து வரும் ஏ.கே.அந்தோணி தலைமையிலான குழுவின் கூட்டத்தில் ஞானதேசிகன் ஆஜராகி தோல்விக்கான காரணம் குறித்து விளக்கியிருந்தார். மேலும் கட்சி மேலிடம் மீதும் அவர் பல புகார்களை வாசித்ததாகவும் தெரிகிறது. இருப்பினும் பொத்தாம் பொதுவாகத்தான் புகார் கூறியிருந்தாராம் ஞானதேசிகன்.

இந்த நிலையில், சத்தியமூர்த்தி பவனில் தன்னைச் சந்திக்க வருவோரிடம், என்னங்க இந்த ராகுல் காந்தி, இப்படி சொதப்புகிறாரே என்ற ரேஞ்சில் எதையே பேசி விட்டார் போல ஞானதேசிகன். அதை எதிர்த் தரப்பைச் சேர்ந்த யாரோ ரகசியமாக மொபைல் வீடியோவில் பதிவு செய்து வாட்ஸ் ஆப்பில் ஏற்றி ராகுல் காந்திக்கே அனுப்பி வைத்து விட்டார்களாம்.

ஞானதேசிகன் பேசிய பேச்சைப் பாருங்கள் என்று குறிப்பிட்டு இ மெயில் மூலம் மேலிடத்திற்குப் பற்ற வைத்து விட்டார்களாம். இதனால் ஜி.கே.வாசன் தரப்பு அதிர்ச்சி அடைந்துள்ளது.

இந்த வேலையைச் செய்தது யார் என்ற ஆராய்ச்சியி்ல தற்போது குதித்துள்ளது வாசன் தரப்பு. ஆனால் யார் என்பதுதான் தெரியவில்லையாம். மறுபக்கம் ஞானதேசிகன் பேயடித்தது போல பெரும் அதிருப்தியுடன் காணப்படுகிறாராம்.