அக்ரஹாராவிலிருந்து புழலுக்கு ஜெயலலிதாவை மாற்ற அதிமுக திட்டம்?

உடல் நலம், பாதுகாப்பு, சிறப்புக் காரணங்களின் அடிப்படையில் சிறை மாற்றத்தை சட்ட விதிகள் அனுமதிக்கின்றன. ஆனால் தண்டனைக் கைதிகளுக்கு மட்டுமே இந்த சிறப்பு அனுமதி கிடைக்கும்.

இதற்கு கைதி தான் அடைக்கப்பட்டிருக்கும் சிறை ஐஜியிடம் விண்ணப்பிக்க வேண்டும். அவர் பரிசீலித்து எந்த சிறையைக் கைதி கோருகிறாரோ, அந்த சிறையின் ஐஜியிடம் ஆலோசனை நடத்துவார். அந்த ஐஜி ஆட்சேபனை தெரிவிக்காவிட்டால் கைதியை அவர் விரும்பும் சிறைக்கு சம்பந்தப்பட்ட சிறை ஐஜி மாற்றி உத்தரவிடுவார்.

ஜெயலலிதா விவகாரத்தைப் பொறுத்தவரை அவர் இசட் பிரிவு பாதுகாப்பின் கீ்ழ் உள்ளவர். பல்வேறு உடல் நலப் பிரச்சினைகள் அவருக்கு உள்ளன. மூட்டு வலி, முதுகுவலி, சர்க்கரை நோய் உள்ளிட்டவற்றால் அவர் தொடர் சிகிச்சை பெறும் நிலையில் உள்ளவர். எனவே இதைக் காரணம் காட்டி சிறை மாற்றத்திற்கு அதிமுக தரப்பு திட்டமிடுகிறது.

அதேசமயம், இதுதொடர்பாக ஜெயலலிதா என்ன விரும்புகிறார் என்பது தெரியவில்லையாம். இதனால் ஜெயலலிதாவின் சம்மதத்தைக் கேட்ட பின்னர் இதுதொடர்பான நடவடிக்கைகளில் இறங்க அதிமுகவினர் திட்டமிட்டுள்ளனராம்.

ஆனால் சிறை மாற்றமெல்லாம் தேவையில்லை, நிச்சயம் ஜாமீனில் வெளியே வருவேன் என்ற உறுதியில் ஜெயலலிதா இருப்பதாக ஒரு தகவல் கூறுகிறது.

ஒரு வேளை புழல் சிறைக்கு மாறினால் ஜெயலலிதா புதிய வரலாறு படைப்பார். அதாவது தனது கட்சி ஆட்சியின் கீழ், சிறையில் இருந்த முதல் தமிழக அரசியல் தலைவர் என்ற பெயரை அவர் பெறுவார்!.